水圍商業步行街 打卡美食一條龍
位於金田路的步行街全程約幾百米，有近50個攤檔，每日下午已陸續營業，商戶種類多，小食、茶飲、茶葉、花店等大包圍，總有一款適合大家。步行街最大賣點是勁近福田口岸，10分鐘已可步行往返，走到步行街最尾就是深圳地鐵福民站D出口，沿路亦有影院足道可以隨時按腳鬆一鬆；銀庄大廈3樓亦有「九色影城」，可入戲院看電影，普通2D電影團購價約¥40已搞掂，戲院座椅有付費按摩功能，可以舒舒服服睇戲。飲品方面，L1層有「瑞幸咖啡」，附近亦有「奈雪的茶」等大家熟悉的茶飲品牌。另一方面，若果大家打算食正餐，步行街旁的食店亦選擇多多，愛打邊爐有「潮汕大目牛肉火鍋」、「椰皇四季椰漿雞」、簡單輕食有「喜家德蝦仁水餃」、「真功夫」等，豐儉由人。此外，步行街前段有一輛紅色英倫風雙層巴士給大家打卡，附近亦有遊樂場設施給小朋友放電；步行街中段有一個高大聳立的「水圍村」牌坊，是水圍村歷史、文化象徵，牌坊雕刻精美，見證了近20年水圍村的變遷與發展。
