劉佩玥年紀大 拒着泳衣比拚
率14位佳麗赴檳城拍外景
14位候選港姐昨日啟程到馬來西亞檳城拍外景，袁偉豪與劉佩玥（Moon）擔任隨行嘉賓。身為師姐的Moon大讚師妹們很乖巧，樂於分享自己當年參選的心得，就是以笑容來令自己不緊張。問到會否穿泳衣跟師妹們比拚？她自嘲年紀大，已過了身形最弗的時期。
袁偉豪與Moon透露今次行程為期4天，故行程十分緊密。Moon坦言最擔心師妹們的狀態：「記得當年我哋係分批去唔同地方拍外景，仲要自己學化妝、Set頭，係一個好大嘅挑戰。」她寄語師妹們留意每日的狀態和帶多些補給品。
問Moon會否穿三點式跟師妹們比拚？她笑言：「唔會啦！因為拍嗰陣我另有任務在身，而且我參選時係身形最弗，依家年紀大喇，唔想再有呢種挑戰。」問到有什麼經驗分享給佳麗？袁偉豪說：「都係老套嗰句『享受過程』，呢行有新朋友加入，都要時間適應製作流程同人際關係。」Moon則讚師妹們可愛和乖巧，希望她們經過特訓後可以表達最好的一面。
3號蔡華英與13號袁文靜跌出網絡人氣榜頭5名，她們均表示不可惜，蔡華英說：「見到其他女仔上榜好開心，我會繼續叫朋友幫手支持。」袁文靜笑言從來沒期望自己上榜：「唔係對自己冇信心，係大家都好叻，每人都有機會。」
施宇琪唔滿意身形
1號李尹嫣、7號施宇琪和9號陳詠詩均表示期待外景之旅，但施宇琪坦言最擔心泳裝環節，因對自己的身形未滿意。陳詠詩表示回想以前做運動員出外比賽的情況，感覺與現在相差不大，一樣會緊張。
