維拉恐怖主場 大屈「基」
猛料艾美利 未執掂防線
歐協聯E組第5輪上演榜首大戰，英超阿士東維拉主場對波甲歷基亞。兩軍目前同以4戰得9分排前兩名，不過首循環歷基亞主場贏過維拉3:2，在對賽成績佔先，維拉要搶得首名，今仗有需要贏波。維拉主場贏面高但主勝太熱，本身攻強守弱，客軍歷基亞亦有相當入球能力，投注首選[3/3.5] 大盤。（NOW 644台周五4:00am直播）
維拉在一年前還是英超下游球隊，去年10月底尚排名英超尾4。球隊花費600萬歐元違約金，向西甲維拉利爾撬走艾美利，取代謝拉特教職。這位前阿仙奴教頭憑真才實學證明物有所值，帶領維拉在上季以第7名完成英超賽季。今季更上一層樓，目前位列第4，與第3位利物浦同分，僅落後榜首阿仙奴兩分，成為爭標分子之一，成績斐然。艾美利領軍後，維拉最強一環在主場，今季英超6戰全勝暫列主場第一球隊（與利物浦相同，但共入23球比利物浦多6個，平均每仗入球接近4個）。維拉自今年2月不敵阿仙奴後，於正式賽事主場只曾於英聯盃不敵愛華頓，但該役基本上起用大量副選，其餘在英超及歐洲賽，已保持恐怖的16連勝。
歷基亞首循環交手入3球
維拉進攻瓣數多，除最強射手奧尼屈堅斯把握力強外，前線多名攻擊手穆沙戴亞比、里安拜尼、杜格拉斯雷斯、祖漢杜蘭甚至瞻前顧後的隊長約翰麥甘尼，都有強大入球能力，即使適度輪換亦不會影響火力。不過艾美利始終未執掂防線，今季13戰共失18球，是英超前7名球隊中失波最多一隊，近7場主場勝仗只有一場零失球；歐協聯4戰有3仗失波共失5球，一條三流防線始終拖住艾美利後腿。歷基亞首循環能在維拉身上取得3個入球，至今在分組賽共入7粒，火力亦大有睇頭，由於基本上不需要擔心失去前兩名位置，今仗亦會放懷同維拉駁火，為爭奪首名資格奮戰。
