阿仙奴拒低頭 與球證會擘面
列齊證據 搵英超賽會攤牌
VAR視像球證執法近期在歐洲球壇掀起滿城風雨，其中上輪英超焦點，紐卡素以一記問題球擊敗阿仙奴，身為阿仙奴領隊的阿迪達事後開腔狂轟英超球證會（PGMOL），會方其後再發聲明追擊，要求PGMOL公開道歉。據知，「兵工廠」更計劃列出一系列證據（見表）與英超賽會攤牌，不過有指他們死咬不放的做法，卻引起了球圈反響，諸如利物浦名宿加歷查便批評「兵工廠」做法過火，熱刺領隊普斯迪高古雖不滿VAR，但也不肯多言，只表示寧願選擇接納球證直接錯判！
阿迪達在上場英超賽後記招中，狠插該役球證艾迪維執法不濟，有關判決令人「尷尬、難以接受、羞恥、作嘔」等，其後阿仙奴再發聲明，要求PGMOL急切需要關注球證執法水平，並要為出錯進行分析，作出解釋及道歉，並寫道：「英超是全球最佳聯賽，有最好球員、教練及支持者，他們都值得擁有更好。」據知，「兵工廠」已整理了一系列有關近年他們因球證錯判而蒙受的影響例子，打算在稍後與英超賽會代表會面時提交，擺明要與球證會反面。
對於阿仙奴的強硬態度，根據英媒報道，包括英超賽會與球證會暫時都不會作出回應，會待仔細研究後，在下周才作跟進工作，但一般相信，他們將不會向阿迪達及阿仙奴等作出處分，最多只會作出警告了事，被指似是「身有屎」的做法。
加歷查批反應過火
不過，對於阿迪達連日來不斷追擊球證會，繼續令事件發酵，球圈中人開始出現不同聲音，批評阿迪達反應過火，現已轉作球評人的加歷查便直言：「我都想問吓阿仙奴，你哋對個入波邊部分有疑惑？VAR確認唔到個波有冇出界，咁係犯規咩？個波可能係五五波啦，球證都冇判越位，VAR又睇唔出，咁你想VAR點做？既然冇明確證據證明入波無效，咁判咗入波，爭論就應該結束啦！」
至於昨晨帶領熱刺主場以1:4慘敗車路士腳下，並有二人被逐的熱刺主帥普斯迪高古，則對球賽因VAR判決阻延了21分鐘比賽更感不滿：「我覺得場波失晒控，好多嘢要VAR干預，我唔鍾意囉！球證判決就係判決，我喺球壇26年，大把差嘅判決，我哋都要接受，一向係咁啦！」
