備戰紅館個唱 Gigi自我隔離

  嘉賓保持神秘會有驚喜

  梁詠琪(Gigi)即將在2月17至19日假紅館舉行一連3場《梁詠琪 時間遇上我們》演唱會,近日她每日積極排舞,無論是快歌部分,抑或需要情感流露的慢歌,即使面對高難度動作,她都能揮灑自如,狀態大勇。

  Gigi坦言已進入整裝待發心情,還透露每晚都會有特別嘉賓,保證觀眾有驚喜,「3晚會有唔同嘉賓,全部嘉賓都好爽快答應,願意同我一齊分享呢個咁開心嘅時刻,全部都係我好欣賞嘅朋友,佢哋曾經同我喺音樂、電影上合作過,有陪伴我一起成長嘅歌手朋友,亦都有我好欣賞嘅新晉歌手。」提到演唱會服裝,Gigi表示由於演唱會內容有故事性,服裝設計上會帶有情感元素,有部分更專程在外國訂造,正趕緊縫製空運來港。「雖然而家只係睇到草圖,但已經令我好期待,所以近排分外注意飲食、操fit自己,務求着到件衫更加靚。而我其實好鍾意食飯,但因為澱粉質會轉化成糖分,而家我會轉食蒟蒻飯,既飽肚、又有爬飯嘅滿足感,最緊要係健康。」

  受囡囡影響決定自彈自唱

  Gigi今次更決定自彈自唱,她表示:「因為囡囡學緊琴,令我重拾對彈琴嘅熱誠,一個月前已經開始練琴,彈畀屋企人聽,但正所謂『瘦田冇人耕、耕開有人爭』,阿囡見我彈,會問:媽咪幾時到我彈?但剛剛無人彈佢又唔彈喎,哈哈!」由於演唱會已進入倒數階段,Gigi近日忍痛「離家出走」,搬到酒店暫住,希望專心準備個唱,「其實呢個決定都好掙扎,健康原因真係需要隔離自己,同時需要更多自己嘅空間,專心背歌詞、練琴,記跳舞steps,需要一個好靜嘅環境,所以我做咗呢個對自己好殘忍嘅決定,我有同囡囡解釋,佢都明白,但夜晚我哋可以face time,如果佢有中文功課唔識,我都一定可以教佢。其實咁樣佢反而會更加期待我個演唱會,到時可能會喺台下尖叫『媽咪,好耐冇見!』,哈哈!」

  專注個唱同時,Gigi亦不忘做善事,希望每位打算送花籃到紅館給她的好友,將這份心意轉贈到屬意的慈善機構,「見到花海當然開心,但我更希望能轉化朋友嘅支持給有需要嘅人,會更有意義!」Gigi準備了一張巨型名牌掛在紅館後台,以答謝每位捐款善長,感謝他們對自己支持、對慈善出一分力。