鄺潔楹5呎止步 歸咎父系遺傳
游水打波參加田徑隊無助長高
鄺潔楹（Judy）首次演出正劇，在《七公主》劇中飾演一名事務律師，同時熱愛劍擊，為了角色，拍攝前她特地去跟專業教練學劍擊，最初打算學4個月，但因為有部分好難的動作她未做到，所以開鏡後繼續練了兩個月，「如果你問我2020年最深刻嘅事，一定係學劍擊，因為我用咗半年時間去學。」
在劇中玩重劍的Judy，最難忘拍攝最後一場很重要的比賽戲份，因教練要她做很多世界級高難度動作，當時她還埋怨教練玩大了，但因遺傳了媽媽的「好勝」性格堅持到底，「劇情講我打劍擊有進步，教練話對我有信心，所以拍攝前3星期我日練夜練，但臨到拍攝前都冇起色，劇組開始想搵替身，監製同教練都叫我唔好勉強，但我唔服輸，同埋有少少運動員嘅精神，堅持咗咁耐，冇理由而家至放棄，同埋如果同人講大部分場口我自己親身上陣，除咗最尾嗰場，我會覺得好唔型，於是拍心口話得。」因為不服輸的性格，Judy試過開完廿幾小時工之後，直落再去練劍，最後真的好神奇地完成了所有動作，不過拍完劇集後她並沒繼續練劍擊，因實在太辛苦，加上她本身並非專業運動員，她說：「初初開始訓練時因為好辛苦，拍完後要去拔罐放鬆，加上唔識用力，整傷咗右腳筋，事後要去做針灸，好彩好快無事。」
曾被批為「背對白機器」
Judy當年以模特兒身份出道拍攝多個廣告，其後加盟無綫，曾主持旅遊節目《3日2夜》、《學是學非》，之後演出《愛·回家》甚受觀眾歡迎，演出機會亦越來越多，但經過今次演出正劇後，她計劃上演技課程增值自己，「今次同多位有經驗對手合作，喺佢哋身上學到很多，同時發覺自己嘅演技好渣，以為拍過處境劇應該應付到拍正劇，原來兩者係兩回事。」她自爆曾被導演批評是「背對白機器」，只是背足劇本，但看不到她在演一個角色，提點她應要做一個有想法的演員，不是只懂跟劇本去做。稍後Judy會接拍一部新劇，劇中要玩功夫，她坦言很享受：「感覺上唔會被定型，因為我細細粒人哋認定我演人哋阿妹、女友同學生，所以好鍾意接受唔同挑戰，最想演同自己本身性格反差嘅角色。」身高150cm的Judy被封為「哈比女神」，她自嘲道：「我小學學游水，中學就打籃球，去美國讀書就參加田徑隊，我一直好好動，只不過冇長高，唯一解釋係基因問題，可能遺傳Daddy嗰邊，我哥哥都係166cm。」
