薛幼妮湯寶如孫佳君婦女節探訪老友記
香港文匯報訊 3月8日婦女節，嘉凡娛樂主席薛幼妮(Amanda)攜同好友湯寶如、孫佳君到恩怡護老之家探訪老友記們。探訪當日各位美女化身愛心大使將一些毛巾和新鮮生果送給公公婆婆們，與他們一起唱唱歌做輕盈的運動。一眾愛心大使們與公公婆婆們都玩得都好開心。
Amanda表示：「疫情終於遠去，今年再來到護老之家探訪老友記們，見到佢地健健康康龍精虎猛真係好開心，仲有啲公公婆婆仲記得我哋之前來過，佢地真係好記性。之前因為疫情一直反覆，所以都未有舉辦大型籌款活動，現在疫情結束，所以我哋嘉凡娛樂會喺6月舉辦一場慈善晚宴，正密鑼緊鼓地籌備中，希望將籌得的善款捐畀有需要的家庭。」
湯寶如表示：「我最近忙緊拍港台劇集《我們的畢業禮》，但聽到好友邀請做慈善，幾忙都要出席，我記得上年Amanda都邀請過我探訪，但因不在港未能出席，今日來到見到佢哋真係好開心，今日我變身成為人肉點唱機，佢哋想聽咩歌我就唱咩歌，見到公公婆婆佢哋都好開心。今日Amanda教手部運動，我都跟住公公婆婆一齊做，有啲仲教返我轉頭，見到佢哋咁投入咁開心，佢哋畀咗好窩心、歡樂的一日我。」
孫佳君表示：「我都係啱啱到港，我係第一次同Amanda嚟探老友記，之前同過Amanda 派飯盒畀露宿者。其實我都好鍾意做義工，見到對方開心自己都會好開心。今日同公公婆婆唱下歌做下手部運動，見到佢哋都好活潑可愛，都好投入參加我哋準備嘅活動。希望佢哋都鍾意今日嘅安排。最近我寫緊劇本希望年尾可以開拍，到時希望大家多多支持。」
