黎明尾場似暗示已再婚

香港仔 P24 2021-07-20

　　自認入棺材踏進婚姻墳墓

　　黎明（Leon）一連9場紅館演唱會前晚圓滿結束，捧場者有李嘉欣和老公許晉亨、衛蘭、緋聞男女蔡思貝余德丞等。有「金句王」之稱的Leon，當晚主動解釋：「我以前講啲嘢有時會太過跳線唔係好明，突然靈機一觸又講緊第二啲嘢，所以記者朋友畀咗個稱號做『金句王』，其實我冇乜金句。」

　　Leon與女友Wing於2018年誕下女兒，但一直未有公開透露婚姻狀況，前晚他說到結婚是男人的墳墓時，突然說要介紹嘉賓出場，但剛降落台的他再「原封」升上來，他笑說：「黎明請黎明係無問題嘅，頭先Leon話入咗棺材，我代佢由棺材行番出來，每個愛是由緣分同感情做起步點，送《情緣》一曲畀大家。」早於頭場時，表演嘉賓以「黎明太太」來稱呼Wing，沒否認的Leon這次自認進入婚姻墳墓的「棺材論」似暗示已再婚。尾聲時，為答謝歌迷的支持，他在胸前做出心心手勢繞場一周，並祝大家身體健康、開開心心、工作順利，謹記永遠所抽到的都是好籤，要珍惜，並承諾好快再與歌迷見面。