江欣燕唔稀罕再婚
主動提離婚前夫零反應
江欣燕（欣欣）接受黎芷珊主持訪談節目《單對單》訪問，剖白單身盛女的內心世界及愛情觀。與前夫拍拖10年、結婚12年才選擇分開的欣欣，坦言是自己主動提出離婚：「可能因為人大個咗，開始認識自己，先發覺我哋內心好大距離。但冇討厭過同佢一齊嘅時間，好多謝佢陪咗我廿幾年，令我眼界闊咗好多。同佢一齊好似好開心，但唔係我本質。」她又直認對前夫留有少許遺憾：「因為係我提出話行開，佢當時係冇反應，佢睇緊波，咁我就話我行動了，佢哦完就繼續睇波，我等佢睇完再解釋番。」
欣欣覺得婚姻是一種綑綁，大家應先想清楚自己需要怎樣的另一半：「我會好小心選擇另一半，唔會再憑感覺，我估我將來嘅會係Partner，唔會係老公，我結過婚所以唔稀罕（再婚）。」欣欣又透露從前的自己只愛談笑不愛談心，但現在已有所轉變：「我發覺飲酒可以幫我拆咗自己道牆，我唔信任人嘅牆，以前我唔會無啦啦搵人分享心事；家係連唔識嘅人，我都願意交心。」節目中欣欣帶芷珊一起買完花再買餸，更親自下廚招呼芷珊與江媽媽同枱吃飯，江媽媽更開腔呼籲愛女「飲少啲酒」，場面既歡樂又溫馨。
