產後首度公開露面 岑麗香不急修身
成個衣櫃得一條牛仔褲啱着
岑麗香（香香）、陳自瑤（YoYo）、吳業坤（坤哥）、龔慈恩及張頴康等昨出席劇集《寶寶大過天》宣傳活動，未有出席的馬國明及李國麟分別以電話及短片分享感受，正身在內地工作的馬國明在電話中笑說：「因要搵奶粉錢，公司已召喚我返來宣傳。」
香香4月底剛誕下細仔，昨產後首度公開露面，並以低胸緊身吊帶裙示人，她表示仍未完全修身，「要着腰封，成個衣櫃只得一條牛仔褲啱着，健康最重要，我唔急於修身。」香香現時有餵母乳及奶粉，日日都是斷斷續續瞓3、4個鐘，幸老公強強很幫得手，又有陪月幫忙。對於劇集在她產後推出，她坦言感到意外，因本身都想休息長少少時間，但都是開心的，因今次是她首次演媽媽角色，自己都期待。她指去年拍攝時大仔還未上學，未能體會做媽媽送兒子返學的心情，直到近月送兒子上學，終於體會到劇中媽媽複雜的情緒，如果遲一年才拍相信會更得心應手。問到會否再追個女？香香不排除說：「搞掂呢個先，順其自然啦！」
陳自瑤喜獲張頴康支持
YoYo於劇中跟張頴康飾演夫婦，她表示今次角色有好多內心戲同情緒崩潰喊戲，幸好張頴康在拍攝期間經常支持她：「佢同我講我啲戲好有發揮，叫我加油，仲話會Backup我，好開心可以同佢合作。」為了飾演全職媽媽這角色，她刻意不梳頭及近乎素顏出鏡，連睫毛液也沒塗上。而下月她會參與一套時裝劇演出，雖不是女一，但相當有發揮。提到她近日於社交網站貼上性感照，她說：「我睇到新聞標題都嚇一嚇，其實今次啲相只不過係歐美風格，一啲都唔性感，有着肉色衫打底。」
坤哥表示今次的角色很突破：「唔再係斯文傻更更，而係一個麻煩、MK嘅馬國明細佬，成日同佢頂嘴，同黃文意又唔小心有咗BB，係一個唔稱職嘅爸爸，吊兒郎當，都幾適合我，係自己嘅另一面，但之後由唔識照顧小朋友變得愛小朋友，成為有擔帶嘅人，同我人生一樣。（與黃文意可有親熱戲？）冇，好可惜，我操得咁辛苦，冇機會騷body，盡量都着緊身T恤。」提到其「波友」洪永城宣布結婚，他已留言恭喜對方，並謂好欣賞他們的結婚相，是最舒服嘅style！
