陳展鵬彈老婆演技未夠班
唔介意與單文柔夫妻檔拍劇
「視帝」陳展鵬相隔3年再有劇集播出，主演的劇集《逆天奇案》自播出以來收視及口碑都不俗，劇集更成為上半年兩線劇集單集收視冠軍，日前接受訪問時，他大談拍攝的苦與樂，以及對手馮盈盈令他有無形壓力：「佢好勤力、又搏，記性又好，講對白快到我接唔住，令我有無形壓力，唔可以NG。」
展鵬在《逆》劇中飾演O記幹探，已不止一次飾演警形的他，笑言還未演到悶，因有很多部門還未演過。劇中他跟飾演黑客Ana的馮盈盈有感情線，二人初次合作，連一向不愛跟拍檔分享演戲的展鵬，亦大分方享個人經驗，甚至將觀眾的意見轉達她，展鵬認為演戲是要令觀眾感動，演員亦要接受觀眾的批評：「一定要睇網上評語，依家Social Media咁自由，唔可以一聽唔入耳就覺得全部都係衰人，如果要更上一層樓，就要知道成個世代做緊咩。」所以他都會收看其他台的劇集，知己知彼。
雖然觀眾對盈盈的演技彈多過讚，但展鵬就大讚盈盈勤力、好搏，做足本份兼記性好，「盈盈講對白好快，快到我接唔住，令我都有無形壓力，唔可以NG，但唔係講晒對白，唔NG就代表好戲，所以我都經常同佢分析節奏同角色層次。」至於跟舊拍檔林夏薇合作則是另一種感覺，因薇薇對演戲好有熱誠及好有要求，加上今次再合作大家都已婚，她會將生活體驗放落角色上，所以今次跟兩人合作都開心，從中亦學到很多。
受太太影響變得健談
近年事業愛情得意的展鵬，由以往甚少談及私人及感情事，到現時會主動提起愛妻單文柔及女兒「小豬比」，不單經常在社交平台分享家庭生活，性格亦由以往的「唔Funny」變得健談，「我喺70後尾期嘅舊派，以前我個年代係唔好搞咁多嘢，『少說話多做事』就係好，但Phobe（單文柔）係90後，佢哋對好多嘢嘅睇法同計算又唔同，自己都會受影響。」問展鵬可想「夫妻檔」拍劇？「我唔介意，但佢（演技）未得嘛，唔好勉強。佢想拍就自己去學，拍戲係好專業，想拍就由低做起，佢可以出去玩吓啲小劇團，我好尊重太太，佢想試都可以。」他又指其實太太入行已得到她最想要的，就是識到他。
