泳兒否認作嘔有喜 諗多咗
當《聲夢》導師壓力大 頭暈胃炎入院
泳兒、鄭欣宜、連詩雅、Gin Lee（李幸倪）、許靖韻、糖兄及Kerryta等，前晚現身將軍澳電視城為《勁歌金曲》錄影。泳兒透露當上《聲夢》導師壓力大，更因頭暈及胃炎兩度入院，而欣宜上星期亦曾入院檢查及照腸鏡，醒後發現被綁在床上，原來她在醒與未醒之間竟逼人聽她唱歌。
近日身體不適的泳兒，前晚接受訪問時談到身體狀況，她透露近日因頭暈及胃炎兩度入院：「有日起身突然好暈，行唔到直線，但冇諗住入院，因為嗰日公眾假期冇醫生睇，但最終都係入咗2次院，因為出咗院又再暈。」她指入院期間照了胃鏡及腸鏡，而事前要飲瀉藥，之後睡在床上郁動唔到，手腳出現麻痹都擔心有事，所以照埋個腦，醫生指她有少少胃炎，但食藥後幫助不大，於是再去睇中醫，中醫指她身子虛弱。
泳兒笑謂，每當說想嘔，同事就會恭喜她，問到可有驗孕？她笑言「又真係冇驗過，但安全嘅！（男友有諗過你有咗？）佢應該會擔心，不過係佢送我去醫院嘅。（未講得？）你哋諗多咗啦！」她估計因近日要拍《聲夢傳奇》甚少休息，有時忙於幫隊員揀歌連飯都吃不到，胃炎可能與做導師壓力大有關。
欣宜照腸鏡 驚爆醒後被綁床上
同場的欣宜，近日推出的新歌《@princejoyce》成為5台冠軍歌，她開心表示完全沒想過，可能大家都需要正能量，而自己每次聽這首歌都會腎上腺上升。欣宜又自爆早前不慎整爆盲腸炎手術的傷口，於是上星期便入院檢查及照腸鏡，醒後發現被綁在床上，她說：「原來醒與未醒之間，逼醫護人員聽首新歌《先哭為敬》，真係好黐線，我最緊張當時有冇爆粗。」
連詩雅願跟「情敵」合作
早前返內地拍劇3個月，連詩雅謂30年來首次離家這麼長時間。被問到最掛念誰？她先賣口乖話最掛住大家，媽咪同埋屋企隻狗，又擔心愛犬會唔認得自己會吠她。當被問到有否與陳家樂視像通話？她就說：「我同好多人視像通話，（黃）翠如同YoYo（陳自瑤），佢哋好重要，大家覺得重要嘅520，自己都唔記得咗，（記得番之後，有冇表示？）唔講啦！」其實連詩雅與陳家樂拍拖已是公開秘密，但早前卻傳出前港姐冠軍黃嘉雯介入二人的感情，問連詩雅可認識黃嘉雯？她說：「對方選港姐時，我有揀她做冠軍，希望遲啲有機會合作。」
