複製韋拿傳奇 棄將變英雄
蘇亞雷斯領馬體會重奪西甲
西甲爭霸來到周日凌晨煞科一輪，力爭冠軍的馬德里雙雄最終分途出擊，齊齊反勝對手。馬德里體育會在蘇亞雷斯連續第2場攻入致勝球下，以2:1反勝華拉度列保住2分優勢，相隔7年再奪冠軍。首席功臣「哨牙蘇」由巴塞棄將變身奪標英雄，重演昔日韋拿傳奇，難怪賽後淚灑球場，場面感人。
馬體會對上一次奪標要數到2013/14球季，當年「床單軍」亦是得到巴塞棄將射手韋拿加盟，繼續大放異彩領軍贏得冠軍。今季「哨牙蘇」亦重演歷史，全季表現出色，力證寶刀未老，其中今場馬體會在上半場先失一球，但換邊後憑安祖哥利亞與蘇亞雷斯各建一功，以2:1反勝華拉度列，賽後馬體會以38戰86分排頭位，2分之差力壓同晚贏波的皇家馬德里，重奪冠軍。
單季21球寶刀未老
細看蘇亞雷斯今季聯賽數據，全季上陣32場攻入21球兼有3助攻，其中最近16個入球直接幫馬體會拿下聯賽21分，成為球隊封王首席功臣。賽後，「哨牙蘇」在球場上帶淚與家人視像對話，並在受訪時表示：「巴塞成日話我老，話我唔可以保持高水平，呢啲都令我非常困擾。我做到喇，佢哋講錯晒。今年對我同家人嚟講，係經歷艱苦嘅一年，巴塞唔珍惜我，低估咗我，多得馬體會畀機會我，我永遠感謝佢哋對我嘅信任。」
另一方面，帶領馬體會贏得球會史上第11座聯賽冠軍，同時亦係佢個人第8個冠軍嘅主帥施蒙尼，賽後都點名大讚「蘇神」：「我早幾日先講過，我哋真係好好彩可以擁有佢，佢係蘇亞雷斯，單係個名已經講明一切。」這位阿根廷名帥期望這冠軍能在艱難環境帶給球迷歡樂。
