谷婭溦勤學廣東話被誤黐線
邊睇劇集邊自言自語唸對白
施匡翹、谷婭溦、譚嘉儀及龔柯允等前晚為《勁歌金曲》錄影。施匡翹在「金榜預測」環節中獻唱新歌《康復期》，問到可擔心節目上遭批評？她坦言心情既緊張又期待：「作為新人係需要多聽真實意見，上節目前好多朋友都問我驚唔驚聽完點評會喊，我希望自己唔會喊。我對自己歌藝有信心，歌曲監製舒文都有教我唱歌技巧，同埋我之前都邊做瑜伽邊練唱歌，重複練習來練氣， 希望以最佳狀態演唱。」
谷婭溦則與龔柯允合唱彭羚的經典歌《來讓我跟你走》，她坦言難度在於廣東話，綵排時不停唱錯幾個字，要不斷死記。她認為要不斷練習才會有進步：「我唱歌咬字比講說話好啲，平時主要都係睇劇集同讀報紙去學廣東話，我會一邊睇劇集，一邊跟住讀對白，好似自言自語咁，屋企人以為我黐咗線。」谷婭溦不諱言廣東話是她發展唱歌事業的最大障礙，故她要很努力去學講，因語言很重要，如果講不好就不行，現會提醒自己慢慢講。對於節目中的點評環節，她笑言有興趣參加：「可以試下畀人評唱功，因為肯定會有人鍾意同唔鍾意自己，如果係中肯意見我會接受。」
