余香凝感恩 有鮑姐做對手
佗B拍微電影奪女主角獎
余香凝（Jennifer）去年底與影后鮑起靜及好戲之人潘燦良拍攝微電影《日子總有我伴你走》，她更憑微電影奪得「最佳微電影女主角」獎，但由於疫情關係，是次微電影比賽未有舉行實體頒獎禮，直到近日才將獎座送到Jennifer手上。
對於今次獲獎，Jennifer直言開心又感恩，更笑言腹中BB「腳頭好」，她笑說︰「梗係啦！BB喺肚入面經歷拍攝同攞獎。不過我覺得最大最大拎獎原因係導演同鮑姐，冇鮑姐做對手戲，唔會有好表現出嚟，所以多謝鮑姐。」Jennifer直言能參與拍攝的滿足感比攞獎更大，而且拍攝時正經歷她的人生大事，感覺很特別，她說︰「其實自己冇諗過攞獎，有得做呢個講親情嘅project已經好滿足，自己一直都好想做關於親情嘅作品，導演第一次搵我拍呢個微電影時，自己計劃緊結婚，到拍攝時就有咗BB，所以所有嘢嚟得好合時。加上自己嘅婆婆都好大年紀，好想做一啲關於親情嘅作品，畀婆婆睇到，或者畀大家睇到，去宣揚要珍惜眼前人嘅訊息。」
大讚拍攝團隊充滿愛
最後她大讚整個拍攝團隊充滿愛，除了有兩位好戲之人鮑姐和潘燦良陪她拍攝外，拍攝時又非常緊張她這個大肚婆，她說︰「拍攝時因為自己有咗BB，所以大家都好緊張我，唔使埋位時大家就叫我坐呀，鮑姐又叫我休息呀，又驚飯盒唔夠營養再加餸，有雞有其他肉叫我食多啲，所以成個團隊好有愛。」所以她表示好想再與整個團隊合作，她說︰「導演好想拍一套電影長片，我都好期待，希望導演寫好咗劇本會搵原班人馬一齊再玩啦！」
