車仔再戰李城做細界
紅軍力追 爭前4唔輸得
3日前喺英足盃決賽交手的車路士與李斯特城，周三凌晨會於史丹福橋再次碰頭，兩軍為保前4位置均不容有失。主場出擊的「車仔」今場會有首席門神艾度亞文迪復出把守最後一關，滴水不漏，撞上擅打穩守突擊的「李城」，勝負只會一球起、兩球止，博[2.5球]細最啱數。（now 611及621台周三3:15am直播）
英超前4之爭，隨着利物浦日前險勝西布朗之後，愈來愈激。聯賽剩餘2輪，「李城」66分排第3，車路士少2分排第4，「紅軍」63分排第5，今場勝負關係重大，雙方都肯定唔想輸，尤其「李城」最後一輪尚要硬撼熱刺，「車仔」亦有歐聯決賽後顧，今場交手，預計雙方均會加強防守。
艾度亞文迪復任正選
陣容方面，車路士板凳深度足，上場英足盃決賽任後備如基斯甸普列錫、芝維爾、夏維斯及艾度亞文迪等均有望復任正選，其中頂替阿列沙巴拿加重返正選的艾度亞文迪，更是防線的信心保證。另邊廂，「李城」預計大部分正選均會繼續披甲，雖然可能略見疲態，但一套防反戰術極度高效，既然英足盃能力抗「車仔」狂攻，即使今場要作客史丹福橋，相信亦不會多失。
事實上，兩軍近3次交手，「李城」錄得2勝1負，但重點是3場的「總入球」均是2球或以下，場場少交收，預計今場戰況亦同樣緊湊，難有多入波。
