期待一見鍾情 方力申拒拍片
貪浪漫玩交友網眾裏尋「她」
《2021十大傑出青年選舉啟動禮》昨日舉行，2014年「傑青」方力申（小方）及2012年「傑青」關心妍（Jade）現身支持，並分享為香港服務的經歷與信念。
小方被問到今年有否心水人選去做提名人？他笑說：「去年獲選的歐鎧淳也是我鼓勵她，再由霍啟剛提名，由他提名好過我，港姐搵提名人就搵我不用搵霍啟剛！」不過日前他到一家相熟咖啡店，有個戴口罩女生主動找他合照，之後對方透過店員代問可否幫她做港姐提名人，但被他婉拒，問到是否怕對方除低口罩原來不是靚女會影響他？「不是啦，一定要認識對方，不會為陌生人做提名人。」
已單身5年的小方日前在清談節目中透露自己玩交友網已3、4個月時間，平日最多只4、5個人會加他聊天，但在節目公開講完，當晚即有十幾人加他成為朋友，不過他笑言都是得個睇字。問他有否自拍放上網？「無呀，都係睇吓，有朋友同我講咁樣交友冇用，秘訣係唔好傾太多，要約出來見面！（真的沒自拍最迷人的沖涼照給對方過目？）沖涼都無化妝，一啲都唔迷人，拍片我一定唔會，但真係有人問咗幾日，到底我係咪真係方力申！」他坦言參與的目的，是希望能滿足自己雙魚座浪漫的心，以及有否可能真的做到眾裏尋「她」，「我諗會唔會有一見鍾情，睇到對方照片心裏就會覺得『你咪係我老婆』！」另谷德昭近日又為小方澄清，當年雅典奧運他跟葉璇當嘉賓主持時於鏡頭前鬧交，但真實版本是二人對稿時討論想以鬧交方式出鏡引起話題，沒料到提早直播了出街被指不和，小方抵死地說：「冇諗過呢個係我演藝事業代表作，我都冇怪肥谷家先幫我澄清！」
關心妍自掏腰包補貼基金會
拿了「傑青」9年的Jade，在獲獎前已做了很多義務工作，到2015年更成立了研亮生命慈善基金，不過疫情下，令籌款面對很大困難，像本來她以教唱歌的收入來交租和支付醫療支出，但因疫情已煞停好一段時間，只好自掏腰包補貼基金會的支出。問到為何不申請政府資助？她表示要等批，且要等頗長時間：「到真正頂不住才算，唯有向朋友揼心口幫忙。」她又特別感謝老公不單財政上支持，更是出心出力，連數也幫她計好，不致她一個人那麼吃力。
