鄭欣宜被揭跳爆手術傷口
參與杜琪峯處男作覺緊張
杜琪峯（杜Sir）、鄭欣宜及盧瀚霆（Anson Lo）早前為虛擬銀行拍宣傳片，昨日3人到尖沙咀出席記者會，現場又首播宣傳片。首拍廣告的杜Sir，大讚二人比他叻及醒目，「我呢啲冇演開戲嘅，對住佢哋其實我係新仔，叻我好多，時代不斷在變，其實年輕同年老唔會相差太遠，可以參與年輕人活動同工作都幾開心。（畀自己幾多分？）導演叫我做咩咪做咩，都係幾好的體驗，原來做演員咁舒服，入行40幾年來未試過喺片場咁開心、咁冇負擔同咁享受，之後如果有人請都會繼續拍。」欣宜對於能參與拍攝杜Sir的「處男作」感到既緊張又開心，她說：「初時個心好驚驚，因覺得杜Sir好型仔好cool，但一roll機佢就好Cute，拍攝好順利同開心。」對於Anson Lo爆她跳舞跳到爆傷口，她說：「拍攝時啱啱做完急性盲腸炎手術，佢拍最後個鏡頭時跳得好落力，見到佢咁樣我都唔輸得！但冇事啦，家好番晒，跳舞勁啲都得。」杜Sir笑說：「年輕怕咩？爆完再爆都得。」欣宜又向杜Sir自薦，表演跳舞給他看，不過杜Sir就心領說：「唔好辛苦你嘞。」
