靚湯馬明互不干涉對方拍親熱戲
預告34歲生日將香港一日遊
馬德鐘（馬神）、湯洛雯（靚湯）、陳煒、何廣沛及郭柏妍等，昨日出席新劇《雙生陌生人》拜神儀式，劇中一人分飾兩角的馬神，拜完神監製叫他要食兩份燒肉，生果都要雙份。馬神今次飾演靚湯舊情人，二人有超多對手戲，但暫未有親熱戲。
已有男友馬國明的靚湯，問到馬明會否唔畀她拍親熱戲？「如果劇情需要都會拍， 佢一定唔會唔畀，我都冇要求佢唔拍，佢都可以拍，不過我拍拖之後都未試過拍錫戲，如果拍之前都會講聲，上次同譚俊彥拍（親熱戲）係拍拖之前拍嘅，對我嚟講都有啲激，（唔畀男友睇？）男友九秒九睇咗。」馬神笑指馬國明不是唔畀靚湯拍親熱戲，只是唔畀和他拍。
郭柏妍拍劇冇港姐包袱
近日靚湯為拍《雙》劇經常要到郊外的農莊取景，O型血的她大呻雙手及雙腳都被蚊叮到布滿紅點，並大讚馬神識自備防曬及蚊怕水，都後悔婉拒了對方的好意。馬神稱羨慕靚湯曬極都唔黑，不像他就算已搽了50度防曬，依然曬黑了很多。靚湯笑指他們的膚色一白一黑，都替打燈的工作人員辛苦。今個月6日是靚湯的34歲生日，她透露暫定會香港一日遊，可能會去行山或去主題樂園staycation。問到男友已返港可以一起慶祝會否開心些？她笑說：「家有視像好方便，唔似以前Daddy個年代要打長途電話，（家可以摸到個人？）我哋呢啲係靈魂交。」記者笑指他們是神交，靚湯只笑不語。
何廣沛和郭柏妍在劇中會有感情線，更不乏對手戲，而他的感情線會周旋於郭柏妍和蔣家旻之間，十分好艷福。問他最後情歸何處？他笑說：「監製仍未寫到，兩個都想要喎，手掌係肉，手背又係肉，不過要畀『甜頭』監製，等佢寫多幾場感情戲畀我。（唔怕朱晨麗嬲？）又關佢事？」郭柏妍今次飾演見習律師，仍未卸任港姐的她，今次已第二次参與劇集演出，之前曾參演《白色強人II》，但戲份不多，而今次戲份多了，她坦言心情少不免緊張：「事前做咗好多功課，亦會熟讀劇本先入廠。（拍感情戲可有底線？）只要角色需要我都可以接受，相信公司寫得嘅尺度都唔會太過火，本身亦冇港姐包袱，就算為角色唔化妝出鏡都可以。」何廣沛卻直言不敢素顏示人，笑指後生女對自己真有信心。
