關心妍考慮轉當演員

  拍攝MV演技大爆發

  關心妍(Jade)相隔5年後再推出廣東新歌《腍》,她在許文軒主持的節目中透露不曾因為誕下女兒而停止音樂工作,這幾年間她會留意聽新歌,鑽研歌曲和教學生,惟一是要好好安排時間。

  對於再出歌,Jade坦言事前有問准老公,主要是大家要互相配合時間,輪流照顧小朋友,「家我除咗要睇住自己嘅時間表外,仲要睇埋老公、囡囡同教學生嘅時間表,家真係仲忙,而我囡囡雖然仲未明歌手呢個職業,但佢知道表演呢件事,佢好好笑會問我今日做完嘢,係咪會有錢,咁咪可以買糖畀佢囉!」

  至於今次新歌MV,她笑言事前有同導演講唔好勉強一定要畀個角色她做,唔見她嗰樣也沒問題,但當收到劇本她就同自己講Good Luck,「因為今次角色要有好多情緒,好難演,仲要處理好多復仇、奸狡感覺,估唔到出來大家覺得我演得好自然,可能人大咗,經歷多咗,又可能平時同個女玩得多角色扮演遊戲,好多時候就要扮演佢朋友,有時扮佢老師,或多或少有啲幫助,今次真係演技大爆發!我可以考慮去做演員,哈哈。」