衛蘭：有啲5年後先明
期待黎明開騷講金句
衛蘭近日獲美國紐約一個音樂串流平台揀選為香港區代表女歌手，聯同34位不同地區的女歌手共同宣揚女性音樂能力，她的照片更出現在當地時代廣場巨型LED屏幕上。昨日她到銅鑼灣出席音樂活動，對此她表示好Surprise，「事前完全唔知呢件事，希望係我啲歌及聲音而被選中。」喜歡唱英文歌的她也希望趁機進軍海外市場、推出英文專輯、以及到外國宣揚廣東歌，問到今次獲選，唱片公司可有給予獎勵？「公司同事戥我開心已足夠，希望大家做音樂嘅質素越來越好。」
昨日她即場獻唱4首歌曲，吸引數十歌迷到場聽歌 。事後她表示：「因疫情關係，已有年幾冇對住觀眾唱歌，所以今日真係好開心，希望以後多啲機會去唱live。」提到她的前老闆黎明（Leon）將於7月再於紅館開唱，她表示好期待Leon的演出，問她想聽他唱歌還是講金句？「我想聽佢講嘢多啲，佢有啲金句我要過咗5年至明，就算家都係有啲聽得明有啲唔明。」談到每年歌手都爭崩頭的紅館跨年檔期，近4年都相繼泡湯變「邪期」，先有劉德華兩年開不成跨年show，之後又有陳奕迅和楊千嬅，但她不信邪，更考慮嘗試申請跨年檔期。
