車仔和波 隊友妻鬧爆華拿
昨晨舉行的歐聯4強首回合，皇家馬德里於主場以1:1逼和車路士。今場焦點，肯定是「藍戰士」前鋒迪姆華拿接連失機成為和波罪人，賽後就連其隊友堤亞高施華的太太都在社交網開腔鬧爆迪姆華拿，超級爆笑。
車路士今場憑基斯甸佩列錫先開紀錄，「銀河艦隊」其後則靠賓施馬門前接應隊友二傳，先用頭槌一控，再「車身窩利」狂轟入網，最終兩軍打和1:1，要靠次回合在史丹福橋分勝負。迪姆華拿今場早段曾在門前接應基斯甸佩列錫頭槌二傳，門前施射慘被主隊門神泰拔高圖爾斯撲出。稍後他尚有一次近門射斜，同樣令人失望，賽後惹來不少網民球迷狂轟。對於愛將的慣性失靈，杜曹反而作出安慰：「佢對韋斯咸都嘥咗個黃金『餐士』，今場又係咁，但無論你點後悔或喊都係冇用，呢個世界有幾百萬人慘過佢，反正大家聽日就會唔記得啦！」
杜曹口下留情，但勢估不到卻是隊友堤亞高施華太太，先後在ig上載兩段片，並寫上：「點解我去到每一隊嘅前鋒都係持續射失……呢個華拿係乜水？我哋需要入波去贏比賽，但我哋前鋒唔識入波囉，我都唔明點解。」
