周柏豪計劃再影結婚相
常講骨痹嘢太太冇反應
無綫《開心大綜藝》前晚於將軍澳電視廣播城直播，89歲的胡楓（修哥）6月19日將於紅館開騷，前晚他聯同嘉賓Supper Moment在節目中合唱預演。修哥對於能邀請到Supper Moment擔任個唱嘉賓表示很開心，「同啲後生仔一齊jam歌，自己都後生好多。」修哥目前正在練歌，稍後才開始排舞，問到他體力上能否應付得來？他笑說：「依家嚟講冇問題，我唱歌都係娛人娛己，最緊要開心同舒服。」Supper Moment隊員都表示企在修哥身旁已感受到活力，能夠跟他同台演出，可以趁機偷師。他們又笑指修哥一直是扮無記性，其實他記性相當好。
周柏豪前晚為14對長者的「婚禮」獻唱送上祝福，並透露獲無國界義工邀為14對夫婦影結婚相，令他印象最深的是一對失明的公公婆婆，他說：「當我聽到佢哋同對方互相許下嘅承諾，我都聽到眼濕濕，人海茫茫搵到個人長相廝守係好難得。（會否跟太太說甜言蜜語？）我成日都講啲骨痹嘢，但白羊座嘅太太冇反應，佢從來都唔理我。」當年柏豪在布吉秘密結婚，只在行禮前1小時才影結婚相，他希望今年結婚5周年可以重遊舊地影一輯靚的結婚相。
