蔡少芬自誇樣靚身材正「顏值擔當」

  「港普F4」合體拍內地真人騷

  由蔡少芬(Ada)、朱茵、陳法蓉及洪欣組成的女團「港普F4」,將首次合體登上內地真人騷《請吃燒烤的姐姐》,不過節目還未出街4人已「火」花四濺,Ada笑稱自己是4人中最年輕成員,更自誇「顏值擔當」,並嘲3位好姊妹才是「港普」,她的普通話發音最正確。

  眾所周知,4人是圈中數一數二的閨蜜團,相識逾20載,姊妹情深。對於「港普F4」首次一起拍攝真人騷,Ada表示期待已久,由4人成為好姊妹開始,她一直期待可以合作拍戲或上節目,今次終得償所願,而節目中她們將合夥開燒烤店,4人流露不少情感,形容是集淚水、開心、搞笑等甜酸苦辣於一身,Ada說:「我哋會否擦出火花?因為我哋關係太好,好到有啲爛,好驚火花一擦就燒着大家,因為我哋每個人性格都好獨特,平時我哋私下玩,都會有鬧交、唔開心嘅時候,所以我哋一齊工作應該會有火花,不過會係好嗰方面。」

  Ada深信4人一起做節目,一定會有默契,互相發揮專長,她說:「我應該負責搞氣氛,好多時4人一齊食飯,我都係主動啲、搞啲笑,朱茵就係笑吓掛住食嘢,洪欣比較多嘢講,但會由頭講到尾,我就會講『其實你講重點得啦』,至於陳法蓉博學多才,喺節目可以提出好多得意問題。」Ada 續說真人騷只要夠真就會好睇,她笑說:「其實佢哋真係要向我請教,我係佢哋老師,無論咩類型真人騷我做咗好多,而佢哋經驗太少,哈哈哈!」

  普通話被張晉嘲冇得救

  4人都被稱為「美魔女」,問到當中誰「顏值擔當」?Ada即笑言:「唔使講,我從來都冇話過我最靚,不過真係唔使講,第一,4個之中,我最年輕,高度嚟講,我係最高嗰個,樣靚身材正呢家嘢,真係好難講。」至於4人中誰的普通話發音最「港普」?Ada再次發揮搞笑本色表示:「佢哋3個都好港普,但我唔係,我啲普通話比較清楚,我應該係最標準。(向老公惡補普通話?)唔需要,我老公話冇得救,仲話我學好咗就冇得笑,不過佢係錯嘅,我覺得我已經學得好好。」