鄭伊健鼓勵巿民落田耕種
夥林珊珊母女做一日農夫
鄭伊健與經理人林珊珊及她的女兒西瓜（李澄）、野人（李怡）雖然幕前合作機會不多，但平常工餘時常相約一起活動，故當珊珊的網上頻道與浸會大學學生合作體驗做一日農夫時，馬上想到邀請鄭伊健帶着西瓜及野人一起體驗農夫生活，初次下田的珊珊更是一試就愛上，計劃往後租田多多體驗鄉郊生活。
知道要到農場體驗，平日熱愛運動的伊健早有準備，帶備新款有型的太陽帽來拍攝，不過一展示出來即被搶空了，而他原來已有多次種田體驗，他說：「我試過好多次同住新界嘅朋友一齊落田耕種，但珊珊佢哋應該係第一次，所以每樣嘢佢哋都覺得好新奇，有時會問一啲意想唔到嘅問題。初時會奇怪佢哋點解會咁問，但可能第一次真係好多嘢唔知，或者觀眾都唔一定知，今次嚟到呢度體驗農夫生活令我哋認識多咗農場嘅嘢。大家城市人，為咗令自己身體健康，間中去郊外郁動吓拎下鋤頭，總好過成日坐喺度。耕種嚴格來講都係一種運動，不過係最輕鬆嘅運動，我覺得一啲都唔辛苦，有時間係應該多啲到郊外參與耕種。食物對香港人嚟講好重要，但太少人參與種植，所以應該支持呢個落田概念。」
享用新鮮蔬菜最開心
珊珊雖然首次落田，但她自言已愛上這個活動，她說：「一直好期待，其實我一直都好想試，所以由開會聽到話要做一日農夫，已經好開心好興奮，到現場勞動咗一日，就更加想租一塊田來耕種，剛才問過呢度啲朋友話真係可以租，公司同事都好支持我，希望可以好快實現。」身旁的西瓜也插嘴說：「其實我嚟之前好擔心，唔知應唔應付到，因為自己平時有啲嬌生慣養又怕蟲又怕濕，估唔到雖然唔熟手，雞手鴨腳，又跌嘢又差啲將個鋤頭鋤到人，但非常之咁 enjoy，不過最開心都係之後食新鮮蔬菜嗰陣，入口嫩滑新鮮，加埋新鮮天然嘅配料，就明白我哋平日食嘅嘢有幾人工化。」身為瑜伽導師的野人也很享受今次的體驗，她說：「今日只係畀自己60分，如果冇時間嘅限制，應該可以做得更好！」
