黎諾懿異地戀無疾而終
難忍講電話都要夾時間
黎諾懿和陳敏之為《師父有請》節目做嘉賓，今集以「驛馬」為主題。對於不少藝人離開香港發展後才紅起來，如劉愷威、陳偉霆、陳浩民、鄧紫棋等，而當年事業低潮期的諾懿，也是參與湖南衛視的《舞動奇蹟》後回港才接到《愛·回家》，並憑「馬壯」一角彈起。諾懿說：「喺娛樂圈浮浮沉沉咁耐，諗住做完《舞動》就算，因為節目畀嚿錢都幾大，完全無心插柳，我唔識跳舞，點知湖南衛視大改革，其中兩位係我粉絲，叫我上去跳4集。」他慶幸遇上對手是金晨，對方剛由北京舞蹈學院畢業，跟他組成「一諾千金」組合，一路殺落去，跳到11集先完。至於敏之曾獲賞識到日本拜小室哲哉為師，可惜公司營運有問題，最終未能如願在日本發展，「我又覺得冇蝕底，賺咗經驗。」
被問到有否試過發展異地戀？諾懿坦言有台灣異地戀，「所有嘢都好完美，但佢唔舒服都得個電話，我接受唔到，我唔係黐身，想拎樣嘢畀你都唔得！講個電話又要夾時間，長期要買機票，所以只係維持咗半年時間。」敏之則試過另一半在加拿大生活，有時發燒留言給對方，由於時差關係，對方醒來傳短訊慰問之時她已康復了，最終維持4年時間後分手。
