事前隱患未清 或毀掉整排牙
作為專門的牙科療程，箍牙點止咁簡單。修復齒科專科醫生朱祖順指出，箍牙是全方位療程，前期必須檢查及修復所有牙科問題才能進行，否則原有的蛀牙、牙骹痛等問題會急劇惡化，做錯一步便可能毀掉整排牙齒。
朱祖順表示，牙醫在箍牙療程開始前要為病人檢查，確保牙肉沒有牙周袋、沒有蛀牙或牙骹痛等問題，未清理原有問題便箍牙或令問題進一步惡化。他質疑自助箍牙產品開發商提供遙距檢查，由用家自行拍照供牙醫透過視像跟進的可靠性，「（遙距）好難睇，返到嚟（覆診）你可以教佢大牙咬成點、門牙點咬等等，得張相睇唔到佢咬得好唔好。唔同位都要慢慢檢查，例如可能係相片以外位置蛀牙，牙醫根本睇唔到。」
雖然部分開發商會安排用家面見香港的註冊牙醫最少3次，但朱祖順認為該安排宣傳效用大於臨床作用，批評以市場推廣角度凌駕臨床安全十分危險，「我哋唔會好輕鬆咁話睇幾多次就得，有事就應該要睇，佢哋一早同病人講只是睇幾多次就得，為病人植入療程簡單諗法，有事可以睇，都未必識去（搵牙醫）。」
朱祖順警告，牙齒只需數個月就可造成不可逆轉創傷，一旦牙齒被「箍死」，牙醫基本上無計可施，「骨頭一收縮就好難生番，有時根本冇得處理，只能建議病人唔好再戴個牙箍，睇吓佢會唔會自己生好啲，手術都未必救到。」
