張智霖浸浴半日感暈眩
犧牲色相參演抗疫電影
由10間電影公司合資開拍以支援電影基層人員的抗疫電影《總是有愛在隔離》，獲不少藝人不收片酬接拍，其中兩位男主角張智霖（Chilam）及張繼聰更不惜犧牲色相、瞓身演出！
戲中2人上演一幕「肉」帛相見搽蘆薈油的場面，Chilam直言：「幫人按摩都唔容易，特別阿聰啲肌肉咁厚……真係每個行業都有艱難嘅地方。」阿聰慶幸與Chilam好熟，犧牲色相都不尷尬。他們除了犧牲色相，還要浸熱水浸足半日，阿聰謂：「以為有桑拿戲好爽，點知浸完冇得按摩，同埋我覺得我哋好似打邊爐個爐入面嘅雜菜，出晒煙！」Chilam也表示浸到暈暈哋。
不過最大挑戰，是要他們唱大熱兒歌《Baby Shark》氹細路，阿聰笑言：「作為歌手唱開啲複雜嘅歌，要唱呢啲簡單旋律係有難度；不過Chilam辛苦啲，佢冇乜點聽過呢隻歌，我就聽咗過億次！拍呢套戲都好開心，可以試到好多唔同嘅嘢，飛車、打鬥、唱歌、捽油等等！」講到飛車戲，阿聰有一幕因趕上車要飛身入車，親身上陣的他即場跟武術指導學習，他說：「真正危險嘅動作，係靠專業武術演員，我試做呢個飛身小動作，希望為套戲出一分力。」
