黃貫中「標淚」驚喜慶生
朱茵親自炮製加料蛋糕
昨日是黃貫中（Paul）57歲的正日生日，老婆朱茵趁機為壽星製造「火辣」驚喜，親自炮製 Wasabi 蛋糕整蠱老公！雖然「其貌不揚」的蛋糕令 Paul 哭笑不得，但得知是老婆親自為他炮製，惟有硬着頭皮照食。但見他吃到「揦埋口面」，更辣到標眼淚，並高呼：「嘩！辣嘅？係咪整蠱我㗎？不過整蠱唔到我，因為我覺得幾好食喎！」之後他又餵老婆吃一口，實行分甘同味！最後朱茵送上真正早準備好的生日蛋糕，為 Paul 送上生日歌及香吻。
問 Paul 被整蠱的感受？他笑說：「其實老婆畀咩我都要食㗎啦，但食完兩個蛋糕後，我真係覺得有 Wasabi 嗰個好味啲，有食緊魚生嘅感覺，芒果就好似吞拿魚嘅口感。」Paul又憶起不少老婆的地獄料理：「佢最恐怖係佢認真下廚嘅時候，仲大鑊過有心整蠱！有次佢用微波爐蒸魚，條魚用保鮮紙包實，叮完出嚟成條魚掹到實一實，仲要唔係好熟咁，總之見到都驚。」朱茵立即為自己平反：「我記得嗰時係識咗佢冇幾耐，呢個係畀佢嘅測試嚟，我要睇佢咩反應，哈哈！」
