湯洛雯賺錢至上 渴望情侶檔搵銀
豪擲逾4千萬購獨立屋有供樓壓力
湯洛雯（靚湯）去年6月公開與「筍盤」馬國明戀情後，未及一年已傳出3次婚訊，甚至有指二人將搬入靚湯以4,500多萬購入的獨立屋築愛巢，靚湯很感激大家對他們的祝福，但覺得報道太誇張了，又強調今年不會結婚，反之重點放在事業賺錢上，更計劃與妹妹湯洛瑤合作一起做KOL。
靚湯去年以首置名義，豪擲4千多萬購入馬鞍山獨立屋，她直言有供樓壓力，故目前賺錢至上，更渴望有機會與男友馬國明以「情侶檔」拍住上搵錢：「我哋未試過情侶檔工作，仲好fresh，我哋都focus搵錢方面，好想一齊搵錢，但要等公司安排。（會收貴啲？）等公司安排。」
「湯馬戀」拍拖至今未及一年已先後3次傳出婚訊，甚至有指馬明將於8月迎娶靚湯，二人更將搬入女方購入的獨立屋築愛巢，靚湯認為報道誇張，並澄清絕無此事：「報道好誇張，連賓客名單、日子都定埋，絕對唔係。（今年結婚？）冇呢個想法。（新屋築愛巢？）絕對唔係愛巢，係我同屋企人一齊置業，只係用我名義，同埋我畀多啲錢，之後會同屋企人搬入去住。」靚湯又無奈地說：「好感激大家祝福我哋，但祝福變咗推進器，大家想快啲見到多啲階段，但我哋其實拍拖時間唔長，覺得大家喺呢方面急進少少，現階段仲係了解中，（結婚）冇咁快，希望大家畀啲空間我哋。（視馬明為結婚對象？）唔講呢啲嘞！」對於戀情受到大家如此關注，靚湯承認始料不及，笑言大家太激進了，但亦無悔公開戀情。
性格狂野冀拍真人騷
入行9年的靚湯，有了愛情後，亦希望能專注事業上，嘗試不同工作，她透露去年除了拍電視劇《一笑渡凡間》及《金宵大廈2》兩套劇，還拍了一部電影，最想拍綜藝節目。外表斯文的她自言其實很狂野玩得：「想試吓拍綜藝節目，因為呢個係可以令觀眾知道自己真實一面嘅渠道，唔似拍劇預設咗一個角色，好多人同我傾偈都話我睇落斯斯文文乖乖女，但其實我可以好狂野，我想拍真人騷，玩即場落妝。」
事業心重的靚湯，透露正計劃做KOL，她說：「我想同妹妹湯洛瑤合作，因為妹妹一直好想做KOL，佢對美容好有研究，我就會同大家分享減肥方法，仲會公開磅數同三圍。（着三點式泳衣出鏡？）三點式係要有美感情況下着，我唔會用性感來做噱頭，同埋我想用真實一面吸引網民，除咗拍同家人相處嘅片外，又會整蠱人。」她又先旨聲明被偷拍的朋友不可以生氣，其實她偷拍後會先讓「受害人」睇片，得到同意才會將片段放上網，大家可以放心。 場地：Oystermine
