薛家燕冇錢搬屋 大感頭痛
寓所被圍封強檢令住址曝光
薛家燕、鄭俊弘（Fred）、曹永廉、譚嘉儀及泳兒等前晚錄影《流行經典50年》，日前完成強檢的家燕姐前晚復工，她笑言因強檢新聞被廣泛報道，令住址曝光教她好頭痛。
家燕姐提到當晚知道住所被圍封感到很愕然，「嗰區有10幾單確診個案，可能擔心傳播出去，嗰晚有好多着晒防護衣嘅人逐家逐戶進行登記，我哋做完晒檢測已經半夜1點半，（可擔心自己有事？）唔擔心，因平日有食好多產品增強身體免疫力。」為怕有事影響工作，她同電台方面講了之後兩日都不會出街，留在屋企做zoom直播。她又稱估不到今次自己強檢的消息，連英國都有報道，令她十分頭痛：「最頭痛就係個個都知我住邊，啲人問我究竟搬唔搬，（會唔會搬？）邊有錢搬？」
鄭俊弘與新公司傾得七七八八
對於《流行經典50年》進入倒數階段，主持了節目4年的家燕姐坦言一定有依依不捨，「我呢3、4年真係做到冇停手，集集都要唱歌跳舞都好攰，好多謝上來節目嘅百位嘉賓歌手，見好就收都係好事嚟嘅，其實畀新一代嘅歌手上節目唱歌都係好嘅。」至於最後一集邀請哪些嘉賓？她表示暫時不可透露，不論曾經上過節目或是甚少上節目的嘉賓她都想邀請，而該集將會加碼播出個半小時。家燕姐又開心表示新抱將於5月臨盆，她會趁這段時間好好休息準備做嫲嫲。
另擔任了《流》主持2年的Fred對於節目將完結亦感不捨，「呢個節目其實帶畀大家好多歡樂，同埋好多難忘嘅回憶，自己最初唔識做主持，都係靠死背稿，喺修哥（胡楓）同家燕姐身上學到好多，又經常聽家燕姐講昔日往事，都係好難忘。」問到未來動向？Fred透露4月將開拍新劇，日後都希望拍劇及唱歌兩邊兼顧。至於他會簽哪間唱片公司？他笑說：「同新公司嘅合約已傾得七七八八，稍後便會公布。」
經常亮相上述節目的泳兒，對於節目即將告一段落，並由《勁歌金曲》取代？她坦言好唔捨得，「作為歌手有機會上音樂節目唱歌都是開心嘅，只要有音樂節目，我都會參與支持。」當晚選唱快歌的她，自爆因服裝比較鬆身，擔心大動作時會走光，因此跳舞時亦不敢郁動太多。
