原子鏸與老公輪更湊B
影全家福囝囝四圍放電
原子鏸（Marsha）上月為摩洛哥籍老公Mehdi El Ajimi誕下混血萌B Matys El Ajimi，適逢囝囝滿月便一家三口帶同愛犬影全家福。礙於疫情關係，身在美國的婆婆鄭佩佩只能透過視像見乖孫，Marsha祈望疫情早日結束，一家人可以回老公家鄉摩洛哥為囝囝大事慶祝搞百日宴。
Marsha的全家福照片中，Matys舒服地躺在媽媽懷裏，小可愛五官精緻，非常可愛，Marsha又忍不住輕吻囝囝，更讓牛年出世的Matys以牛仔裝扮造型留下紀念，期間Matys不時對着鏡頭放電，融化全場女士的心，連Marsha也被囝囝冧爆：「雖然瞓得唔係幾好，但每一次望到佢，我就覺得一切都好值得，因為佢真係好得意。」初為人母一個月，「新手媽媽」Marsha自言不覺辛苦，並透露現時餵哺母乳：「對我嚟講係一份好美麗嘅回憶，因為可以同BB更加親密，呢種感覺真係難以言喻，只有做人媽媽，先會有呢份體驗，不過BB家成日肚餓，所以都有啲難湊。」為了讓Marsha適時休息，老公主動舉手輪更，令她好不感動：「佢幫咗我好多，大概每晚9點到凌晨2點就會輪更，幫手餵奶、換片、抱住BB氹佢瞓覺，佢真係一個好好嘅爸爸。」
鄭佩佩隔空「抱孫」
除了「神隊友」好老公，Marsha身在美國的媽咪鄭佩佩雖然未能回港探望孫仔，但也會通過視像通話，隔空「抱孫」及為女兒打氣；問到媽咪有否傳授育兒秘笈？Marsha笑言：「媽咪冇乜教我，因為佢已經唔記得晒！不過佢話我哋細個成日趴喺度瞓，家好多人都話呢個睡姿比較危險，所以我都係等BB起身，tummy time（俯卧時間）先畀佢趴一陣，訓練頸部嘅肌肉協調。」疫症肆虐，Marsha仍未決定會否為囝囝舉行百日宴，她寄望疫情早日結束，屆時便可以一家人到老公家鄉摩洛哥大事慶祝：「呢個係佢哋嘅習俗，新生BB第一次返摩洛哥，會舉行一個盛大嘅慶祝活動，類似香港嘅百日宴。」
