譚俊彥擬退居幕後做導演
預感快將飾演張振朗老竇
譚俊彥（Shaun）、張振朗和朱敏瀚（Brian）為《師父有請》節目擔任嘉賓，今集以「命中貴人」為主題，Shaun表示在事業上遇到不少貴人，大部分都是女性，如初初找他拍《男人四十》的許鞍華、沒工開找他再拍戲的張艾嘉、邀請他入無綫的樂易玲等。
雖然有不少女貴人，但現在Shaun就視身旁的張振朗為貴人，他解釋：「有一段時間經濟唔係咁好，我話想考定個健身教練牌，點知振朗鬧我，話做演員最緊要個信念，要集中做好自己做緊嘅事。」對於入行初期不被看好，Shaun表示曾經遇過有對手做戲不會望住自己，「對方只在乎自己其中一邊面靚仔，我話不如你休息啦，我對住塊木板做好過啦！我試過喊戲喊唔出，被睇死話我生活太幸福，未捱過就梗係喊唔出，咁我咪返去對住塊鏡去練習囉！」振朗非常佩服Shaun珍惜每次演出的機會，並付出百二分努力，見證他親自騎馬從山頂衝落懸崖，後來《拳王》的擂台戲，原本只是替身打，但他看不過眼，最終自薦上陣跟真泰拳拳王對打，打完之後全場演員為他歡呼。
振朗被前輩批冇主角樣
振朗稱初入行拍劇都被前輩話：「你呢啲樣做唔到男主角。」後來因為扮張智霖而成為焦點，「開頭一定係好事，因為多人認識，不過難關係點樣撇甩呢個名，有兩年我都孭住張智霖呢個名去好多地方演出，不過幸好最近終於撇甩。」Brian因性格怕醜曾經被前輩指「好寸」，而早期被安排到《都市閒情》時，他一度心有不甘，「我都好大膽，直接同個監製講話我只係想拍劇，我有劇就會走。監製對我好好，有劇為我度期，兩年後就真係放我走。《都市閒情》係我加入TVB之後第一個家庭，每一個人都好好，冇任何競爭，我得獎都有多謝《都市閒情》，我喺呢個節目學會一係唔好接，接咗嘅工作就要盡力做好佢。」
Shaun認為最滿意的作品永遠都是下一部，不太會回想以往的事，問到其目標是否攞視帝？「視帝當然好，不過我都想挑戰幕後工作，我意識到張振朗上位太快，我好快要演佢老竇。我一向都鍾意做幕後，因為主導權會多啲，我畀5至10年時間自己，希望可以做到導演或者背後創作嘅工作。」振朗也以視帝為目標，但目前是希望繼續跟不同的演員合作擦出火花。
