高海寧不介意做四線
高海寧、張曦雯和李佳芯一起接受節目《師父有請》訪問，高Ling坦言初入行時拍劇有聽過難聽的說話，「有個導演同我講：『你呢世都做唔到主角』，真係幾大打擊......不過我唔記得佢係邊個喇！」她亦試過被海量的新聞打擊，「喊過無數次，試過要睇精神科醫生，但每次想放棄做呢行時，就會有電影或工作搵你。有記者去我父母工作場所搵佢哋回應，佢哋唔識應付會驚呀嘛，我真係好嬲。」她指無論女一還是二、三、四線，她都樂意做，「佘詩曼同我講過，唔好理角色係咩，做好佢，嗰場戲你就係主角，甚至你做得好好，可能蓋過主角嘅光環。」
